كثيرًا ما تنتشر صور على مواقع التواصل الاجتماعي لسيارات بدون لوحات معدنية في شوارع مصر، بعضها يضع جمل ساخرة موضع اللوحات وبعضها يضع شعارات هيئات أمنية أو قضائية، ما يثير حفيظة بعض المعلقين على تلك الصور، ليتناول الأمر رائد شرطة قرر أن يوجه رسالة لمن يخلع نمر سيارته.
الرسالة وجهها رائد في فيديو نشرته صفحة «مصر مقبرة الغزاة»، وقال فيه: «بلدنا دي بقى مليانة حاجات مستفزة اللي احنا بنشوفها في البلد دي لما تلاقي عربية ماشية في الشارع وصاحبها شايل النمر اللي عليها، شايل اللوحات المعدنية يعني، وكأنه بيقول لكل الناس يا أرض اتهدي ما عليكي أدي، بصولي، حاجة كدة تخلي أي حد ماشي في الشارع أعصابه تثار ويستفز من الحركة دي».
واستطرد: «مش مشكلتنا إن حضرتك عندك مركبات نقص، بلاش تقرف الناس، خليك طبيعي زي خلق الله، مش لازم تشيل النمرة بتاعتك أو مش لازم تسودلنا النمرة بتاعتك، وكأن يعني بتقول للناس أنا VIP».
وتابع: «أنت إيه الأهمية يعني بتاعتك أما تسود النمرة أو لما تشيل النمرة، وتحط أي كلمة غريبة، إيه يعني إيه اللي هيحصل يعني؟ أنت كدة مهم؟ أنت كدة ملكش دعوة خالص بالأهمية، ولو كنت مهم هتبقى مهم في السيء مش مهم في الصالح خالص».
واختتم رائد الشرطة الفيديو قائلًا: «حط نمرتك وشيل السواد اللي عليها، هتلاقي الناس بتحترمك أكثر وبتحبك أكثر وشكلك حلو وشكل الهيئة اللي أنت منتمي ليها أيً من كان الهيئة نوعها إيه يعني هيبقى شكلها محترم أكثر، خليك طبيعي كدة ولو مكنتش طبيعي يا عم حاول إن أنت تبقى طبيعي وبطل استفزاز في الناس، وحط نمر عربيتك وخليك راجل محترم».
