عبرت الإعلامية سالي عبد السلام، عن ندمها وحزنها الشديد على سوء معاملة والتها قبل عدة سنوات.
وقالت «سالي» خلال أولى حلقات برنامج «قصة حقيقية»، التي تقدمه على قناة «الأولى»، ردًا على حديث متصلة، تدعى «نسرين»، عبرت خلاله عن عدم حبها لأمها: «أنا حاسة بكل كلمة قولتيها، لأني كنت بمر بتجربة زيها، وطبيعي جدًا في السن ده تكوني عاملة كده».
وأضافت «سالي» خلال حديثها لـ «نسرين»: «طبيعي برضه عشان وزنك زائد تتصرفي كده، وأنا برضه كان وزني زائد وقتها زيادة مش طبيعية، يمكن بنعمل التصرفات دي وقتها علشان المجتمع مش بيتقبلنا، والناس بتعيرنا».
وأردفت: «لكن أنا شايفه إن ممكن يبقى عندنا قصة حلوة نحكيها أفضل، يعني أنا ممكن أحكي قصة فقدان وزني، ممكن أحكي قصتي مع أمي، أنا كنت وحشة جدًا معاها، ومكنتش بسمع الكلام، وكنت بضايقها، وكنت بعمل حاجات وحشة كتير».
وتابعت «سالي»: «أنا لحد انهاردة ندمانة على اللي كنت بعمله في أمي وبقولها على التلفزيون، ووالله العظيم ببوس إيديها ورجليها وأقولها سامحيني، لدرجة إن ممكن أوطي اللبس أمي الجزمة في الشارع وأنا مذيعة وكبيرة كده ومبيهمنيش لأني بحاول أعوضها».
وكشفت «سالي» عن قصة لصديقة لها كانت تستاء من كثرة مكالمات والدتها قبل موتها، غير إنها منذ وفاتها تبكي حتى هذه اللحظة لفقدانها.
وواصلت «سالي» حديثها عن الفترات العصيبة في علاقتها مع والدتها، قائلة: «ساعات من كتر اللي كنت بعمله مع أمي كانت بتخرج عن شعورها وتقولي أنتي شيطان، ودماغك ناشفة، وشكلك مش حلو»، مضيفة: «أنا بلتمس لها ألف عذر لأني أنا اللي كنت بطلعها عن شعورها».
وأتمت «سالي» حديثها: «الدنيا دوارة، وفي حق عباد في الدنيا، أنا بعاتبك يا نسرينن عشان تفوقي لأني كان نفسي حد زمان يجي يقولي الكلام اللي بقوله لكي ده، كنت أتمنى حد يلحقني، عشان لما فوقت فوقت متأخر أوي، وبقيت قصة من القصص».
