تجوّل الإعلامي أحمد موسى، ضمن إحدى فقرات برنامجه في أحد الأسواق والتقى سائق «توك توك» وتحدث معه.
وقال سائق «توك توك»: «الناس دي هي اللي هاتخرب البلد، وياريت الكلام اللي أنا بقوله مايتشالش، البلد زي الفل وفيها فلوس وفيها كل حاجة حلوة، إيه موضوع السكر ده، بص على الخضار وعلى السوق، الناس كلها بتشتري والناس معاها فلوس، وكل الناس والله العظيم معاها فلوس، ماتمسكش في السكر، إيه يعني السكر، مش موجود؟ انتوا بتتكلموا على كيلو سكر؟ بص الخضار موجود والفاكهة، والبلد كلها فلوس، سكر إيه وأزمة إيه يا عم؟ مين اللي عامل أزمة؟ مافيش أزمة ولا فيه أي حاجة في البلد».
وأضاف: «إمبارح الماية اتعكرت قالوا السيسي عكرها، والله ما في أزمة والبلد كلها خير والناس هي اللي عاملة الأزمة وكل حاجة موجودة والفلوس موجودة والخير موجود وربنا مبارك، بس نتقي الله في بعضينا، الناس مش مقتنعة ومافيش قناعة واللي عنده عايز تاني، واللي معندوش بيبص على اللي عنده، إنما والله البلد كلها خير، كل الناس معاها فلوس، وأديك شايف السوق، صور الناس اللي رايحة تشتري، الناس كلها معاها فلوس، والخير موجود بس الناس تتقي الله في بعضيها إحنا عايزين نتقي الله في بعضينا بس بأمانة الكلام ده مايتشالش».
كان الإعلامي عمرو الليثي سبق والتقى سائق توك توك، اشتكى له من غلاء الأسعار، وسوء التعليم، وتردي الوضح الصحي في مصر.
